EÐL403

Markmið

Nemendur eiga að a) þekkja sögu nútíma eðlisfræði, b) sýna þekkingu á takmörkuðu afstæðiskenningunni, c) skilja grunnhugtök skammtafræðinnar, d) þekkja eiginleika atóma, e) þekkja gerð atómkjarnans og eðli geislavirkni.

Leiðbeiningar

Mikilvægt er að lesa reglulega undir tíma það efni sem farið verður í. Kennslan fer fram í fyrirlestrum, dæmatímum og verklegum æfingum. Fyrirlestrar – Farið verður yfir tiltekið efni í kennslubók og efnistök stundum dýpkuð frá því sem þar er. Umræður verða um efnið eftir því sem við á og spurningum svarað. Mikilvægt er að lesa reglulega heima það efni sem farið verður í, bæði undirbúa sig fyrir tíma og lesa efnið vandlega að loknum fyrirlestrum.

Dæmatímar – Nemendur reikni dæmi úr kennslubók eða dæmi frá kennara heima en farið verður yfir þau í dæmatímum eftir þörfum og því hvað tími leyfir. Heppilegast er að nemendur reikni sem flest dæmi á eigin spýtur til þess að öðlast skilning á námsefninu. Einnig er ýmislegt sem tekið hefur verið í fyrri stærðfræðiáföngum nauðsynlegt til að ná góðu valdi á dæmareikningi.

Verklegar tilraunir – Nemendur gera verklegar tilraunir, undir leiðsögn kennara. Skil á niðurstöðum í verklegu eru skv. ákvörðun kennara. Verklýsingar liggja frammi nokkru fyrir verklega tíma og er mikilvægt að undirbúa sig vel heima.

Verkefni

Skýrslur – Skila á tveimur skýrslum úr verklegum æfingum. Skiladagar eru nokkrum dögum eftir að tilraun er gerð en kennari gefur nánari upplýsingar þegar þar að kemur. Frekari upplýsingar um skýrslugerð koma fram í skriflegum leiðbeiningum og í tímum.

Heimadæmi – Heimadæmum á að skila tvisvar og verða skiladagar tilgreindir þegar dæmin verða lögð fyrir.

Verkefni – Nemendur vinni tvenns konar verkefni á önninni. Annars vegar fræðilegt og verklegt um RLC– rásir og hins vegar fræðilegt verkefni sem skila á sem ritgerð og kynningu fyrir félagana.

Tekið verður tillit til frágangs og framsetningar við mat á öllum verkefnum.