ENS603

Áfangalýsing

Í áfanganum verður gefið ágrip af enskri bókmenntasögu frá upphafi fram á 18. öld með það fyrir augum að nemendur geti tekist á við lestur texta frá ólíkum tímabilum. Lesnir verða skemmri textar og sýnishorn úr lengri textum frá merkustu tímabilum bókmenntasögunnar. Jafnframt verður eitt stórt leikverk, Hamlet eftir William Shakespeare, tekið til vandlegrar yfirferðar. Fjallað verður um enska málsögu og uppbyggingu og þróun málsins samhliða bókmenntasögunni. Unnið verður áfram með þá færni sem nemendur hafa tileinkað sér í fyrri áföngum og lögð áhersla á alla færniþætti (ritun, lestur, hlustun og tal). Unnið verður að því að gera málnotkun nemenda markvissari og fágaðri, m.a. með ferliritun fyrir ritgerð úr Hamlet, vikulegum dagbókarskilum um námið, myndbandsverkefni um dæmigerðan dag úr lífi nemandans, jafningjakennslu nemenda á sígildum smásögum og fleira.

Markmið

Nemandi

• kynnist sögu og þróun enskra og amerískra bókmennta
• þroski hæfni í að lesa og greina bókmenntatexta frá helstu tímabilum enskrar bókmennta- og málsögu
• þjálfist í að skilja og túlka enska bókmenntatexta með líkingamáli og þungum orðaforða og læri að beita flóknum bókmenntafræðihugtökum
• sýni meira sjálfstæði í vinnubrögðum og geti dregið eigin ályktanir
• geti gert grein fyrir viðfangsefnum sínum á lipurri, blæbrigðaríkri og hnökralausri ensku
• þjálfist í að leiða hóp í vinnu með enska bókmenntatexta
• þjálfist í að tala (á ensku) frammi fyrir kvikmyndavél
• geti unnið sjálfstæða heimildaritgerð á ensku