ÍSI2A13-SAM

Framhaldsskólaeiningar: 13
Þrep: 2
Undanfari: Enginn
Kennsluáætlun (PDF)

Lýsing á efni áfangans

Íslandsáfanginn - SAM (menningarlæsi) er áfangi á fyrsta ári. Honum er ætlað að auka áhuga, þekkingu og skilning nemenda á íslensku samfélagi, sögu þess og tungu. Í Íslandsáfanganum er höfuðáhersla lögð á að nemendur tileinki sér vönduð vinnubrögð við fjölbreytta verkefnavinnu. Verkefnin snúa fyrst og fremst að félagsfræði, íslensku og sögu, auk þess sem upplýsingatækni er samofin verkefnavinnunni. Nemendur þjálfast í að vinna með öðrum, þurfa að sýna frumkvæði og læra að bera ábyrgð á eigin námi. Sérstök áhersla er lögð á lestur og að nemendur þjálfist í að beita móðurmálinu, bæði í ræðu og riti. Áfanginn byggist að miklu leyti á verkefnavinnu í kennslustundum undir leiðsögn kennara. Námið fer fram utan skólans sem innan og sækja nemendur sér fróðleik og gögn á fjölbreytta vegu, m.a. í vettvangsferðum.

Lokamarkmið áfangans:

Nemandi skal hafa aflað sér almennrar þekkingar og skilnings á:

• helstu grunnhugtökum félagsfræðinnar, s.s. gildum, viðmiðum, félagslegu taumhaldi og félagsmótun
• sögu Menntaskólans á Akureyri og skólasögu Íslands í grófum dráttum
• byggðaþróun og atvinnulífi í eigin heimabyggð
• hvernig hægt er að hafa áhrif á eigið samfélag
• ýmsum sögulegum og félagsfræðilegum viðfangsefnum sem eru að einhverju leyti mismunandi frá ári til árs

Nemandi skal hafa öðlast leikni í:

• að koma fram fyrir aðra og tala máli sínu á skýran og greinargóðan hátt
• að skrifa vandaðan texta samkvæmt reglum íslensks máls
• að afla sér upplýsinga sem tengjast efni áfangans með viðeigandi aðferðum (geti nýtt sér bóksöfn, upplýsingar á vef, viðtöl, o.fl.)
• heimildavinnu í samræmi við Hagnýt skrif (2003)
• grunnþáttum myndvinnslu
• vinna með öðrum

Nemandi skal geta hagnýtt þá almennu þekkingu og leikni (hæfni) sem hann hefur aflað sér til að:

• sýna hugkvæmni við lausn verkefna
• sýna sjálfstæði í vinnubrögðum
• sýna ábyrgð gagnvart náminu og skólanum
• meta upplýsingar og vinna með þær á þann hátt að þær skili honum þekkingu og aukinni hæfni til náms, m.a. við ritun heimildaritgerða, kynninga og annarra verkefna
• greina stöðu sína í því umhverfi sem hann lifir, bæði samfélaginu og sögulegu umhverfi.
• skilja samspil nokkurra helstu þátta í gangverki íslensks samfélags

Námsmat:

Fjölbreytt verkefnavinna.