Í Menntaskólanum á Akureyri hafa íþróttakennarar leitast við af fremsta megni að fylgja takti tímans og koma til móts við nemendur með nútímaþarfir í huga.
Lokamarkmið íþróttakennslu í MA er að auka þekkingu nemenda almennt á íþróttum, líkams- og heilsurækt og gera þá hæfari og meðvitaða um ábyrgð á eigin heilsu í framtíðinni. Einnig að nemendur öðlist áhuga og jákvætt viðhorf til íþrótta, líkams- og heilsuræktar, fái tækifæri til að vinna með öðrum og taki þátt í leikjum og íþróttum sem auka félags- og siðgæðisþroska sinn. Þannig styrkja nemendur sjálfsmynd sína og temja sér heilbrigðan lífsstíl.
Þjóðfélagsbreytingar síðustu áratuga hafa leitt til hreyfingarleysis og annarra miður hollra lífshátta og afleiðingarnar eru ýmsir velferðarsjúkdómar. Hjarta- og blóðrásarkerfið veikist og hætta verður á að ýmis stoðkerfisvandamál s.s. í öxlum og baki geri vart við sig. Afleiðingar þessara þátta birtast yfirleitt hjá börnum og unglingum í lélegri samhæfingu, stirðleika og óæskilegri líkamsreisn. Markviss hreyfing er ein helsta forsenda góðrar heilsu og hefur þar með mikil áhrif á starfshæfi og vellíðan. Með verklegri og bóklegri kennslu íþrótta-, líkams- og heilsuræktar á framhaldsskólastigi er brugðist við þessum atriðum á markvissan hátt.
