Þýska er töluð í Þýskalandi, Sviss og Austurríki og er auk rússnesku algengasta móðurmál Evrópubúa. Íslendingar eiga í miklum samskiptum við þessi lönd á sviði viðskipta, vísinda og menningar svo eitthvað sé nefnt og margir Íslendingar lifa og starfa þar. Ennfremur sækja sífellt fleiri ungir Íslendingar til Berlínar, höfuðborgar Þýskalands, til framhaldsnáms eða í tengslum við ýmsar listgreinar og góðir íþróttamenn fá í auknum mæli atvinnutækifæri í öllum þessum löndum. Stór hluti erlendra ferðamanna til Íslands er þýskumælandi og kunna menn vel að meta hve margir hér á landi reyna að tjá sig á þýsku.
Þýska er ekki svo frábrugðin íslensku hvað varðar framburð, málfræði og orðaforða og gengur Íslendingum því ágætlega að skilja og tala málið. Þegar nemandi hefur lokið þýskunámi sínu við Menntaskólann á Akureyri á hann að vera fær um að lesa fjölbreytta texta og bjarga sér á þýsku í samskiptum við fólk bæði hérlendis og erlendis. Hann á ekki síður að hafa innsýn í menningu og siði hinna þýskumælandi landa, hafa tileinkað sér víðsýni og skilning og bera virðingu fyrir margbreytileika þjóðanna.
