Um sjálfsmat í MA

Sjálfsmatsnefnd MA 2012-2013

Bjarni Guðmundsson
 formaður
Guðný Guðmundsdóttir

Sigurlaug Anna Gunnarsdóttir
Stefán Þór Sæmundsson

Sjálfsmati hefur verið sinnt kerfisbundið við MA síðan 1997. Sjálfsmatsnefnd hefur yfirumsjón með þeim hluta sjálfsmats skólans sem telst formlegt og skipulagt en að auki má nefna að kennarar og annað starfsfólk hefur haft frumkvæði að ýmsu sjálfsmati einfaldlega vegna þess að það hefur haft til að bera eldmóð og áhuga á því að ná betri árangri í skólastarfinu. Nefndin gerir áætlun til þriggja ára og nákvæmari starfsáætlun fyrir eitt skólaár í senn. Hana skipa 4-5 starfsmenn (þar af a.m.k. einn stjórnandi) og er einn þeirra formaður nefndarinnar og sér um að boða fundi og stýra starfinu. Nefndin fundar vikulega á starfstíma skólans.

Matið er byggt á ýmsum könnunum og athugunum á starfi og markmiðum skólans. Áfangakannanir fylgja þriggja ára hring; fyrsta árið er lagt mat fyrir í áföngum í félagsgreinum, annað árið í íslensku og erlendum tungumálum og þriðja árið í stærðfræði, raungreinum og íþróttum. Fjórða árið er lagt mat á ýmsa aðra þætti skólastarfsins, s.s. aðbúnað, aðstöðu, líðan starfsfólks, bókasafn, námsráðgjöf, stjórnun, viðhorf foreldra og tölvumál.  Reglulega eru umræðufundir og rýnihópar með nemendum og starfsfólki, sem kallað er Hlýtt á nemendur og Hlýtt á starfsfólk. Auk kannana eru valin viðfangsefni á hverju ári sem byggja á tölulegum gögnum, s.s. um brottfall og gengi nemenda. Tölfræðileg gögn eru einnig tekin saman í lok hverrar annar, annars vegar um einkunnir og fall í áföngum (sem sviðsstjórar taka saman) og hins vegar um skólasókn. Þessi gögn eru birt i skólaskýrslu.

Samstarf: Skólinn hefur verið til fjölda ára í samvinnu við dr. Sigurlínu Davíðsdóttur og dr. Penelope Lisi um hugmyndafræði lýðræðislegs sjálfsmats sem leggur áherslu á svokallaða valdeflingarnálgun (empowerment) sem í stuttu máli felur í sér að mikilvægt er að nota lýðræðislegar aðferðir i sjálfsmati og að allir starfsmenn taki þátt í því. Frá árinu 2010 hefur skólinn verið í samstarfi við Háskólann á Akureyri um mat á nýrri námskrá. Stefnt er að því tengja sjálfsmat skólans betur við grunnþætti náms og markmið skólans (þ.e. skólasýnina og markmið námssviðanna).

Í skólasamningi eru eftirfarandi markmið sett fram:

• Að tengja sjálfsmat skólans betur við grunnþætti náms og markmið skólans (þ.e. skólasýnina og markmið námssviðanna).
• Að leita leiða til að tryggja umbótaferli sjálfsmatsins.
• Að setja fram mælanleg markmið eða árangursmælikvarða til þess að gera sjálfsmatið skilvirkara.
• Að leita leiða til þess að gera lýðræðislegt sjálfsmat aftur hluta af formlegu sjálfsmati skólans (sjá nánar um endurskoðun á sjálfsmati skólans í umsókn til verkefnasjóðs skólasamninga)