Um námsframvindu

Menntaskólinn á Akureyri er bekkjaskóli. Nemendur fylgja námskrá bekkjarins og eru í fullu námi. Ef sérstakar aðstæður valda því að nemandi getur ekki verið í fullu námi skal hann snúa sér til námsráðgjafa.

Ef nemandi vill flýta sér í námi skal hann snúa sér til námsráðgjafa eða stjórnenda sem meta hvort slíkt er hægt og skipuleggja í framhaldi af því námsferil með nemandanum.

Nemendur sem standast próf og hafa staðist reglur um skólasókn eru sjálfkrafa skráðir í skólann næsta skólaár og þurfa ekki að sækja um skólavist.

Reglur um námsframvindu í nýrri námskrá (frá og með skólaárinu 2010-2011).

(Um nemendur skv. eldri námskrá - sjá neðst)

Til þess að útskrifast með stúdentspróf frá MA þarf nemandi að hafa lokið 240 einingum samkvæmt námsskipulagi viðkomandi námssviðs með tilskildum árangri, þ.e. einkunn hvers áfanga verður að vera 5 eða hærri. Þó er hægt að sækja um sérstaka undanþágu um að fá að útskrifast með fall í einum áfanga og skulu skriflegar umsóknir um það berast til aðstoðarskólameistara. Til þess að geta sótt um þetta þarf nemandi að uppfylla eftirfarandi skilyrði.

• Áfanginn má ekki vera úr námsefni 1. bekkjar.
• Nemandi verður að hafa þreytt endurtökupróf í áfanganum.
• Nemandi verður að hafa fengið 3 eða hærra í falláfanganum.
• Nemandi þarf að hafa fengið að lágmarki 6 í veginni meðaleinkunn á árinu.

Nemandi sem fær að útskrifast með fall í einum áfanga þarf samt sem áður að hafa lokið 240 einingum.

Ef nemandi fellur á bekk getur hann sótt um að fá að endurtaka bekkinn. Nemandi sem endurtekur bekk þarf að taka aftur þá áfanga sem hann fékk lægri einkunn í en 7. Þetta gildir þó ekki um lokaáfanga greina og staka áfanga.

Annaskipti

Ólögráða nemendur geta haldið áfram á vorönn þótt þeir falli í prófum á haustönn, hafi þeir fylgt skólareglum (m.a. um skólasókn). Lögráða nemendur þurfa að ljúka að lágmarki 15 einingum á haustönn til að halda áfram námi í sama bekk á vorönn.

Milli bekkja

1. bekkur. Nemandi þarf að ljúka með fullgildum hætti öllum áföngum 1. árs til að geta hafið reglulegt nám á 2. ári. Nemandi getur þó farið milli bekkja með fall í íþróttum en þá þarf hann að taka viðbótaráfanga í íþróttum á 2. ári.

Svokölluð uppvinningsregla gildir í ensku, frönsku, stærðfræði og þýsku, þ.e. ef nemandi fellur í áfanganum á haustönn getur hann fengið áfangann metinn ef hann hækkar sig það mikið í sömu grein á vorönn að hann nái að meðaltali 5 í greininni. Athuga að þetta gildir einungis í reglulegum prófum en ekki endurtökuprófum.

Íslandsáfanginn

Áfanginn er símatsáfangi og því ekki hægt að þreyta endurtökupróf. Ef nemandi fellur í áfanganum getur hann endurtekið sömu eða sambærileg verkefni og lögð hafa verið fyrir í áfanganum sem er þá ígildi endurtökuprófs (þó ekki fleiri en tvö verkefni).

Til að standast áfangann þarf að skila að lágmarki 95% verkefna.

Velgengnisdagar

Nemandi sem ekki skilar verkefnum á velgengnisdögum eða lýkur áfanganum með fullgildum hætti vinnur sambærileg verkefni eins fljótt og auðið er í samráði við verkefnisstjóra velgengnisdaga.

Fall í áföngum

Hægt er að endurtaka þrjú próf að vori, gegn gjaldi.

Nemandi sem fellur í einhverjum áföngum er skyldugur til að reyna við endurtökupróf í MA ef hann hyggst fara milli bekkja. Nái hann þeim ekki getur hann sótt um að sitja bekkinn aftur.

Nemandi með fall/föll að loknum endurtökuprófum

Einhverjir skólar bjóða upp á fjarnám að sumri og ef þeir áfangar teljast sambærilegir áföngum í MA getur nemandi sótt um að fá slíka áfanga metna (að því gefnu að nemandinn hafi þreytt endurtökupróf í MA). Nauðsynlegt er að hafa samband við aðstoðarskólameistara, sviðsstjóra eða námsráðgjafa til að fá upplýsingar um hvort námið/hæfnistigið telst vera sambærilegt. Athugið að ekki er hægt að taka Íslandsáfangann í öðrum skólum.

Nemandi sem endurtekur fyrsta bekk

Ef nemandi endurtekur bekk getur hann sótt um að fá að sleppa þeim greinum sem hann hefur náð lokaeinkunninni 7 eða hærra.

Reglur um námsframvindu í námskrá fyrir 2010

Til þess að flytjast milli anna skal nemandi í fullu námi í 2. - 4. bekk ljúka 9 einingum á haustönn hið minnsta. Nemandi sem ekki nær einingalágmarki getur óskað eftir því að endurtaka fyrri bekk. Ólögráða nemandi í 1. bekk getur haldið áfram á vorönn þótt hann nái ekki einingalágmarki, gegn því að hann bæti ástundun. Til þess að flytjast milli námsára skal nemandi hafa lokið minnst 18 einingum á hverjum tveimur önnum, þ.á.m. öllum undanförum þeirra áfanga sem kenndir eru á næsta námsári. Ekki er hægt að fara milli bekkja með fall í grein nema áfanginn teljist vera lokaáfangi.

Ákvæði um nemendur sem ekki ná lágmarkseinkunn á annarprófi

Standist nemandi ekki áfangapróf á haustönn getur hann því haldið áfram námi í greininni á vorönn ef hann nær lágmarkseiningafjölda, með því skilyrði að hann taki sig verulega á og skólasókn á vorönn verði yfir viðmiðunarmörkum. Bæti hann sig svo á reglulegu annarprófi að meðaltal einkunna í greininni haust og vor nái lágmarkinu 5 telst nemandinn hafa lokið báðum áföngunum.

Ef nemandi stenst ekki próf í haustannaráfanga en nær prófi í vorannaráfanga án þess þó að bæta sig svo að haustannaráfanginn verði gildur, má hann endurtaka próf í haustannaráfanganum. Nái hann ekki lágmarkseinkunn eru báðir áfangarnir ógildir. Nemandi sem hefur fengið fallinn haustannaráfanga metinn gildan vegna þess að meðaltal haustannar- og vorannaráfanga er 5 eða hærra, getur sótt um að endurtaka próf í falláfanganum. Skal það heimilað næst þegar skólinn býður upp á próf í þeim áfanga og annars ekki.