Menntaskólinn á Akureyri er bóknámsskóli á framhaldsskólastigi þar sem nemendur ljúka námi með stúdentsprófi, sem veitir þeim aðgang að námi í háskólum, heima og erlendis.
Nám og kennsla er mismunandi eftir námsgreinum og námsmat sömueiðis. Í flestum áföngum er námsmatið að hluta til símat og að hluta próf, skriflegt og/eða munnlegt. Sumir áfangar eru próflausir, þ.e. ekki með munnlegu eða skriflegu lokaprófi. Þá eru margvísleg verkefni á námstímanum metin til einkunnar. Fyrirkomulag námsmats er kynnt í kennsluáætlun áfangans.
Sjá einnig Reglur um skólasókn.
Um námsmat
Í Menntaskólanum á Akureyri er lögð áhersla á að námsmat sé fjölbreytt og reyni á þekkingu, leikni og hæfni. Það gildir um bæði námssvið skólans, raungreinasvið og tungumála- og félagsgreinasvið, og alla bekki. Nemandi sem hefur lokið stúdentsprófi frá skólanum á þannig að hafa
- unnið fjölbreytileg verkefni, bæði einstaklings- og hópverkefni sem reyna á ólíka hæfniþætti, s.s. virkni, samvinnu, sköpun, ástundun og sjálfstæði í vinnubrögðum
- tekið margs konar skrifleg og munnleg próf
- unnið viðamikið lokaverkefni í samræmi við áhugasvið og áherslur í náminu
Námsmatið í MA hefur tvíþættan tilgang. Annars vegar að meta árangur skólastarfsins þannig að nemandinn, kennarinn og skólinn viti hvernig gengur að ná settum markmiðum námsins. Hins vegar gegnir námsmatið því markmiði að vera leiðsagnarmat, leiðbeina nemendum á uppbyggilegan hátt hvernig þeir geti bætt þekkingu sína, leikni og hæfni. Mikilvægt er að námsmatið endurspegli þau markmið sem sett eru í náminu og það sé áreiðanlegt, réttmætt og sanngjarnt.
Síðast breytt: fim 13.sep 2012
