Góð heimsókn í Kjarnaskóg

Nemendur á íslenskubrú fóru í heimsókn í Kjarnaskóg í dag, ásamt kennurum sínum, Jóhönnu Björk Sveinbjörnsdóttur og Herdísi Helgadóttur. Þar fengu þau aldeilis frábærar móttökur frá starfsfólki sem bauð upp á kaffi og popp yfir eldinum. 

Heimsóknin er liður í áfanganum Nærsamfélagið þar sem markmiðið er að kynnast ýmsum stöðum og stofnunum í bænum, víkka sjóndeildarhringinn og æfa sig að nota íslenskuna. Aðra hverja viku fara því nemendur í vettvangsferð.

Hópurinn tók strætó suður í Kjarnaskóg og gekk þaðan. Sum gengu svo alla leiðina til baka heim og fengu því fína hreyfingu í kaupbæti.