Dagur íslenskrar tungu

Gulir miðar á Degi íslenskrar tungu

Upp er runninn Dagur íslenskrar tungu. Að því tilefni hafa nemendur Menntaskólans á Akureyri fest gula miða á glerveggi bókasafns skólans. Þar hafa þeir skrifað örstuttar hugleiðingar um það sem á þeim brennur, pælingar um lífið og tilveruna og á stundum vitnanir í annarra manna verk. Miðarnir eru nafnlausir.

Skólameistari greip nokkra gula miða af bókasafnsveggnum og las þá upp í löngu frímínútum:

• Sál menntskælings deyr í hverri próftíð
• Aukaverkanir próftaflna: kvíði, stress, ógleði og minnisleysi
• Lífið er eins og hornaföll, þú getur aldrei munað allar reglurnar
• Ég diffra til að gleyma
• Þegar ég verð stór verð ég ekki lítill lengur
• Ef allir gengju í sömu átt myndu engir mætast (Elías Mar)
• Ef þú gengur þröngsýnn niður gang lífsins gengurðu framhjá dyrum möguleikanna
• Mikilvægustu hlutirnir í lífinu eru ekki hlutir
• Ég hef aldrei skilið tilganginn með að skilja tilganginn...
• Að vera blindur er eins og að sjá með vísifingri
• Við sjáum hlutina ekki eins og þeir eru heldur eins og við erum.

Gulu miðarnir verða geymdir og úrval þeirra skráð í sögu skólans - það sem nemendum var efst í huga á Degi íslenskrar tungu 2012.