Elvar Björn og Viltė fengu styrk úr Afreks- og hvatningarsjóði HÍ

Elvar Björn og Viltė ásamt rektor Háskóla Íslands, Silju Báru Ómarsdóttur. Kristinn Ingvarsson tók myndina.

Tveir fyrrverandi MA-ingar hlutu styrk úr Afreks- og hvatningarsjóði stúdenta HÍ. Alls fengu 29 nemendur, sem stóðu sig framúrskarandi vel í námi til stúdentsprófs og hófu grunnnám í Háskóla Íslands nú í haust, styrk úr sjóðnum. Sjóðurinn styður afreksnema til háskólanáms en við mat á styrkþegum er þó ekki einungis horft til árangurs þeirra á stúdentsprófi heldur einnig annarra þátta eins og virkni í félagsstörfum í framhaldsskóla og árangurs á öðrum sviðum, til dæmis í listum eða íþróttum. 

MA-ingarnir sem fengu styrk eru þau Elvar Björn Ólafsson og Viltė Petkutė. Á hi.is segir þetta um styrkhafana:

Elvar Björn Ólafsson brautskráðist frá Menntaskólanum á Akureyri í vor með afar glæsilegum árangri. Hann var mjög virkur í félagsstarfi skólans og sat í fjölmörgum nefndum ásamt því að taka virkan þátt í leikfélagi skólans. Hann hefur enn fremur náð frábærum árangri í forritunarkeppni framhaldsskólanna og auk þess látið að sér kveða í bæjarpólitíkinni á Akureyri. Elvar hefur innritast í nám í hagnýtri stærðfræði.

Viltė Petkutė útskrifaðist frá Menntaskólanum á Akureyri í vor. Óhætt er að segja að hún hafi verið virk í félagslífi skólans, í leiklist, dansi, kór og kvikmyndagerð, og þá var hún formaður nemendafélagsins Hugins á síðasta ári sínu í skólanum. Viltė hefur hafið nám í hjúkrunarfræði.

MA sendir þeim Elvari Birni og Viltė innilegar hamingjuóskir og óskar þeim velfarnaðar í námi sínu og lífi.