Föstudagsplatan úr safni TóMA – Breska bylgjan & Ein með öllu

Breska bylgjan & Ein með öllu

Við grömsum í vínylplötusafni skólans á föstudögum til jóla. Við rifjum upp vel valdar íslenskar safnskífur sem plötusnúðar TóMA þeyttu á dansiböllunum í Möðruvallakjallara á níunda áratugnum og tengjum kynslóðir í MA saman með því að setja plöturnar undir nálina alla föstudagsmorgna.

Föstudagsplata vikunnar er Breska bylgjan frá árinu 1984. Steinar gaf út, hönnun umslags var í höndum Sveinbjörns Gunnarssonar. Platan geymir tólf lög með breskum flytjendum, „misstórum“ í bransanum á níunda áratugnum. Henni til halds og trausts er safnplatan Ein með öllu sem Steinar gaf út árið 1983. Við getum ekki farið í gegnum vínylplötusafn TóMA öðruvísi en að „pylsuplatan“ fái umfjöllun og spilun, þó ekki sé nema vegna umslagsins sem líklega verður að teljast eitt það einkennilegasta af þeim öllum. Myndina af pylsunni tók Bjarni Jónsson. En hvað var efst á baugi hjá TóMA þegar plata vikunnar kom út? Við skulum rifja upp greinaskrif stjórnar TóMA í skólablaðinu þann 1. desember árið 1984.

Starfsemi T.Ó.M.A. hefur ekki verið sem skyldi í byrjun skólaárs, frekar en hjá öðrum félögum innan skólans. Veldur því verkfall opinberra starfsmanna. Af því leiddu erfiðleikar við að gefa út félagsskírteini og gera áætlanir um tónleikahald. Ekki má skilja þetta sem svo að stjórn T.Ó.M.A. áfellist opinbera starfsmenn og baráttu þeirra fyrir bættum launakjörum. Þvert á móti lýsir stjórn T.Ó.M.A. yfir fullum stuðningi við aðgerðir þeirra í kjarabaráttunni.

Starfsemi félagsins mun í vetur einkennast af lífsgleði og orku, en einnig mun stjórnin reyna að virkja félagsmenn, sem eru yfir 200, til starfa innan félagsins, því ekkert félag þrífst án virkra félagsmanna. Stjórnin lofar því (algengt kosningaloforð) að félagsskírteini borgi sig upp í mynd afsláttar á tónleika og aðrar uppákomur. Óskir félagsmanna hafa beinst að ýmsum tónlistarmönnum, svo sem Pax Vobis, Baraflokknum, Megasi, Með nöktum, Das Kapital o.fl...

Lögin á Bresku bylgjunni:

1. Special Aka – Nelson Mandela
2. Sade – Your love is king
3. Fiction Factory – Ghost of love
4. Bluebells – I’m falling
5. Alarm – Where were you hiding when the storm broke
6. General Public – General Public
7. Smiths – What difference does it make
8. Wang Chung – Dance hall days
9. Icicle Works – Birds fly (whisper to a scream)
10. Carmel – More more more
11. Psychedelic Furs – Heaven
12. Simple Minds – Up on the catwalk

Lögin á Einni með öllu:

1. Mari Wilson – Just what I always wanted
2. Bananarama – Shy boy
3. Belle Stars – Sign of the times
4. Blue Zoo – Cry boy cry
5. Madness – Our house
6. Tappi tíkarrass – Ilty ebni
7. The singing sheep – Baa-baa black sheep
8. Culture club – Time (Clock of the heart)
9. Blancmange – Living on the ceiling
10. Ultravox – Hymn
11. A Flock of seagulls – Wishing (if I had a photograph of you)
12. Lola – Fornaldarhugmyndir
13. Pat Benatar – Shadows of the night
14. Michael Schenker Group – Dancer