Ratatoskur hleypur um ganga MA

Íkorninn Ratatoskur

Hefðbundið skólahald vék fyrir fróðleik og fjöri þegar hinn árlegi Ratatoskur, uppbrotsdagar í MA, fór fram dagana 12. og 13. mars. Fjölbreytt námskeið einkenna dagana, fyrirlestrar og upplifanir sem nemendur og starfsfólk skipuleggja í sameiningu.

Uppbrotsdagarnir draga nafn sitt af íkornanum Ratatoski úr norrænni goðafræði sem hleypur upp og niður stofn Asks Yggdrasils. Á sama hátt einkennist skólinn af miklu lífi þessa daga þar sem nemendur flakka á milli ólíkra viðburða í stað þess að sitja í hefðbundnum kennslu- og vinnustundum.

Skólafélagið Huginn á heiðurinn af skipulagningu dagskrárinnar. Samkvæmt tilkynningu frá félaginu var boðið upp á fjölmörg námskeið þar sem nemendur fengu tækifæri til að kynnast nýjum áhugamálum eða dýpka þekkingu sína á spennandi viðfangsefnum. Nú var starfsfólk sérstaklega hvatt til að taka meiri þátt og bjóða upp á námskeið og viðbrögðin leyndu sér ekki. Líklega hefur sjaldan eða aldrei verið jafn mikið í boði á Ratatoski, hér má sjá dæmi um námskeið sem nemendur sóttu:

• Skáknámskeið með SviMA
• Chernobyl í máli og myndum
• Bezelbakstur
• Kósý smásjárvinna
• Bókaklúbbur
• Pönnukökur og spil
• Jóga nidra
• Stoðtími í efnafræði/stærðfræði
• Hádegisganga
• Vonarbrú – hjálparstarf að heiman
• Finnska 101
• Stafsetningarkeppni
• Fjallaskíðaferð á Kaldbak
• Rauðakrosskynning
• Kleinugerð frá grunni
• Kappsmál
• Tónfræðikennsla TóMA
• Svefn 101

Myndir frá Ratatoski má finna á Instagram og Facebook MA.