Einingafjöldi: 5
Þrep: 3

Í boði fyrir: Allar brautir
Námsmat: Áfanginn er próflaus og byggist á verkefnum sem skilað er á önninni. Sem dæmi um verkefni má nefna gagnrýni, skapandi verkefni innblásin af breskri menningu og listum, ígrundanir og annað í þeim dúr. Áfanginn æfir hina fjóra færniþætti tungumálanáms og er krefjandi og skemmtilegur
Kostnaður: Nemendur bera sjálfir kostnað af ferð til London
Annað: Áfanginn telst til sérgreina kjörnámsbrautar og mála- og menningarbrautar. Hámarksfjöldi nemenda í áfangann er 25.

Áfanginn er valáfangi fyrir nemendur á 3. ári. Hann er skapaður með það í huga að nemendur fái að kynnast menningu og listalífi á Bretlandseyjum. Lögð er áhersla á skapandi og gagnrýna hugsun og að nemendur skoði hvernig við afmörkum og skilgreinum menningu og listir. Í áfanganum verða skoðuð ólík list- og menningarform eins og þau koma fyrir innan Bretlands og hvernig bresk menning og listir hefur áhrif út fyrir eigin landamæri, sérstaklega í ljósi sögu Bretlands sem heimsveldis. Rýnt er í tónlist, myndlist, dans, leikrit, ljóð, kvikmyndir og höfundar slíkra verka skoðaðir nánar. Áfanginn felur í sér menningartengda ferð til Lundúna til þess að sjá og upplifa menningu og listir á eigin skinni, en í þeirri ferð verður farið m.a. á söfn og menningartengda viðburði af ýmsu tagi. Áfanginn felur í sér verkefni sem nemendur vinna ýmist í hópum eða sem einstaklingar og því gerð krafa um aga, sjálfstæði og góða samvinnu.

Þekkingarviðmið

Nemandi skal hafa öðlast þekkingu og skilning á:

  • hvað felst í hugtakinu menning og hver er munurinn á hámenningu og lágmenningu
  • ólíkum birtingarmyndum breskrar menningar í gegnum tíðina og fram á okkar dag
  • ólíkum formum listsköpunar og frægum dæmum frá Bretlandseyjum
  • sértækum orðaforða sem tengist efni áfangans
  • áhrifum breska heimsveldisins á menningu og listir annarra landa

Leikniviðmið

Nemandi skal hafa öðlast leikni í að:

  • taka virkan þátt í samræðum og umræðum og beita málfari við hæfi
  • gera skapandi verkefni á mismunandi formi
  • skoða á gagnrýninn hátt ýmis sköpunarverk
  • sjá hvernig menning eins lands getur átt þátt í að móta menningu annarra landa
  • lesa á milli línanna og átta sig á dýpri merkingu kvikmynda, sjónvarpsefnis og tónlistarmyndbanda

Hæfniviðmið

Nemandi skal geta hagnýtt þá almennu þekkingu og leikni sem hann hefur aflað sér til að:

  • tjá sig á skilmerkilegan hátt og geta tekið þátt í umræðum um menningu og listir
  • sjá áhrif lista og menningar í umhverfi sínu
  • skilja betur aðra menningu og mikilvægi hennar í uppbyggingu samfélags
  • finna sinn styrkleika þegar kemur að sköpun og hvernig má nýta hann innan náms og verkefnavinnu
  • víkka eigin sjóndeildarhring
  • skilja betur breska menningu birtingarmyndir bresks menningarlífs hér á landi
  • öðlast dýpri skilning á menningu og daglegu lífi í Bretlandi