Einingafjöldi: 5
Þrep: 2
Forkröfur: ÞÝSK2DD05

Í þessum áfanga er byggt áfram á þeirri kunnáttu sem nemendur hafa þegar tileinkað sér. Enn er lögð áhersla á að efla menningarvitund þeirra og þekkingu á staðháttum og siðum þýskumælandi landa. Áfram er unnið með alla færniþættina með aukinni áherslu á munnlega tjáningu. Unnið verður með fjölbreyttara námsefni en áður s.s. mismunandi textaform, hljóð- og myndefni. Nemendur auka orðaforða sinn og færni í notkun málsins. Gerðar eru auknar kröfur um sjálfstæð vinnubrögð og árangursríka námstækni.

Þekkingarviðmið

Nemandi skal hafa öðlast þekkingu og skilning á:

  • mannlífi, menningu og siðum í þýskumælandi löndum
  • samskiptavenjum og mismunandi notkun málsins eftir aðstæðum
  • grundvallarþáttum þýska málkerfisins
  • formgerð og uppbyggingu texta og mismuninum á töluðu og rituðu máli
  • flóknari orðaforða sem er nauðsynlegur til að ná hæfnimarkmiðum áfangans

Leikniviðmið

Nemandi skal hafa öðlast leikni í að:

  • skilja talað mál um kunnugleg efni og greina aðalatriði í fjöl- og myndmiðlum þegar fjallað er um afmörkuð málefni
  • lesa margs konar gerðir texta og vinna úr þeim á mismunandi hátt eftir því hver tilgangur með lestrinum er hverju sinni
  • afla sér hagnýtra upplýsinga, taka þátt í samræðum um afmörkuð undirbúin efni og um efni sem hann þekkir
  • halda stuttar kynningar og beita framburði og málnotkun á sem réttastan hátt
  • skrifa frásagnir um ýmis efni
  • nota upplýsingatækni og hjálpargögn, svo sem orðabækur, við ritun texta

Hæfniviðmið

Nemandi skal geta hagnýtt þá almennu þekkingu og leikni sem hann hefur aflað sér til að:

  • skilja daglegt mál og bregðast rétt við
  • fjalla á nokkuð ítarlegan hátt, munnlega og skriflega, um efni sem hann hefur kynnt sér
  • tjá eigin skoðanir og persónulega reynslu
  • skrifa ýmiss konar texta og geta fylgt þeim ritunarhefðum sem eiga við í hverju tilviki fyrir sig
  • beita viðeigandi mál- og samskiptavenjum og leysa úr málum sem upp geta komið
  • tileinka sér efni mismunandi texta og geta dregið ályktanir um efni þeirra
  • nýta þekkingu og leikni til að leysa úr viðfangsefnum, einn eða í samstarfi við aðra
  • meta eigið vinnuframlag og framfarir
  • sýna aga, metnað, sjálfstæð vinnubrögð, jákvæðni og trú á eigin getu